حبس کا حال سنانے کو سخن مانگتی ہے
حبس کا حال سنانے کو سخن مانگتی ہے در نہیں مانگتی دیوار دہن مانگتی ہے موسمِ حرص وہ آیا ہے کہ ہر شاخِ شجر پھول دو چار نہیں سارا چمن مانگتی ہے ہم تو ہیں فقر و فقیرانہ روایت کے امین خلقتِ شہر امیرانہ چلن مانگتی ہے جسم کرتا ہے طلب رات گئے جب آرام روح اس وقت عبادت کی تھکن مانگتی ہے ہاتھ کیوں بڑھ کے چراغوں کو نہیں لو دیتے آنکھ کیوں شام کے سورج سے کرن مانگتی ہے شہرتِ دستِ ہنر مند ہے منت کشِ حسن شوکت و زینتِ پوشاک بدن مانگتی ہے تجھ سے یہ کس نے کہا ڈر ہے عبادت کی اساس یہ تو بے لاگ لگی اور لگن مانگتی ہے وہ بتائیں کہ ہے احساس کی قومیت کیا شاعری جن کا یہ کہنا ہے وطن مانگتی ہے حسنِ اظہار تصنع تو نہیں ہے عاصمؔ شاعری لفظ کا بے ساختہ پن مانگتی ہے
