ہر تیر جو ترکش میں ہے چل جائے تو اچھا
ہر تیر جو ترکش میں ہے چل جائے تو اچھا حسرت مرے دشمن کی نکل جائے تو اچھا رہ جائے اکائی مری قائم تو غنیمت ساعت یہ قیامت کی ہے ٹل جائے تو اچھا خیرہ ہوئی جاتی ہیں نگاہیں، وہ چمک ہے سورج نئی تہذیب کا ڈھل جائے تو اچھا ٹھوکر کہیں لگ جائے نہ اس تیز روی میں اب وقت کی رفتار بدل جائے تو اچھا یہ سانس کی ڈوری بھی جو کٹ جائے تو بہتر اک پھانس ہے سینے سے نکل جائے تو اچھا فردا کے حسیں خواب دکھائے کہ مرا دل خوش رنگ کھلونوں سے بہل جائے تو اچھا ڈالے گئے اِس واسطے پتھر مرے آگے ٹھوکر سے اگر ہوش سنبھل جائے تو اچھا
