کچھ اس سے روابط جو زبانی نکل آئے
-
کچھ اس سے روابط جو زبانی نکل آئے سب حلقہ نشیں دُشمنِ جانی نکل آئے اک شرحِ تعلق سے، پرستش بھی، ہوس بھی کتنے ہی محبت کے معانی نکل آئے یہ سوچئے محفل میں تھا گستاخِ نظر کون شاید کہ شناسائی پرانی نکل آئے رگڑی ہیں بہت ایڑیاں اس دشت میں ہم نے ممکن ہے کسی دن یہاں پانی نکل آئے جگ بیتی سمجھ کے جسے ہم سننے لگے ہیں ایسا نہ ہو اپنی ہی کہانی نکل آئے تم سلسلۂ پُرسشِ احوال رکھو تو لہجے میں مرے شستہ بیانی نکل آئے