فرصت نہ ملی کارِ جہاں بانیِ دل سے
فرصت نہ ملی کارِ جہاں بانیِ دل سے اترے نہ کبھی تختِ سلیمانیِ دل سے کیا سرو و سمن سیر کرے باغِ جہاں کی حیراں ہے جو یک غنچہ گلستانیِ دل سے نازاں ہیں بہت اہلِ زمیں شمس و قمر پر یہ ذرّے بھی روشن ہیں درخشانیِ دل سے لوگو ابھی کچھ وقت ہے، چاہو تو بدل لو دربانیِ دنیا کو نگہبانیِ دل سے ہے سنگِ تہِ آب، ہمالہ ہو کہ جودی زخّاری و موّاجی و طغیانیِ دل سے ہاتھ آئے جو قسمت سے وہ گنجینۂ خوبی چھُٹ جائیں ہم اس بے سروسامانیِ دل سے دنیا کی طرف دیکھ کے خوف آتا ہے مجھ کو معموریِ آفاق ہے ویرانیِ دل سے ظاہر میں تو سب جیب و گریباں ہے سلامت ہے کام یہاں چاکِ بدامانیِ دل سے اِس دشت میں، اُس دشت میں چکراتا پھرے گا غافل ہے جو ہر ذرہ بیابانیِ دل سے پہنائے دو عالم سے نکل جائیں گے ہم بھی لگتا ہے یہ اندازِ پر افشانیِ دل سے ہر خار ہوا بادیۂ غیب کا سیراب جاوید اسی آبلہ سامانیِ دل سے
