قصیدہ (١١)

(میاں ذوق در مبارک بادی عید )

شیخ ابراہیم ذوق

شاہا ترے حضور میں خواہانِ صد شرف

 گر عید یک طرف ہے تو نو روز یک طرف

یک سو کرے ہے تہنیت آغازِ مشتری

 یک سو ہے زہرہ نغمہ سرا، لے کے چنگ و دف

 فتنے کو امن کہتا ہے تیرا کہ لا تَقَمْ

عالم کو حفظ کہتا ہے تیرا کہ لا تَخَفْ

نسیانِ جود تیرا اگر ہو گہر فشاں

 ہو قدرِ دُرِّ بیش بہا کم تر از خزف

 تیرا دلِ صفا دمِ ایقان و معرفت

 آگاهِ رمز ’ لو كَشِف ‘وسرِ ’ من عَرَف ‘

تو  باعث ِتفاخر شاہان ِروزگار

تو وجہِ اعتبارِ سلاطینِ با سلف

بہ ذوق کی دعا ئے اجابت قریں شہا

اس ساعتِ خجستہ میں ہے تیر بر ہدف

 جب تک ہمیشہ عید کے دن عیدگاہ میں

 بہرِ نماز ِعید ِمسلماں ہوں صف بصف

اور جب تک آفتاب بھی نو روز کو پھر آئے

 طے کر کے سب بروج سوے خانۂ شرف

نوروز و عید دونوں ہوں فرخ تجھے مدام

 با حرمتِ نبی و بہ حقِ شہ ِنجف